2Cor 12 | WSK | STEP | Nainimi patowara ko kilek mu ko nunguning mel yawara bo me aratoso. Bare ani am ngual aimi patawirik ale mel ipingira te iwita Kari Biya aga kausam se arigem mu ko balikko.

2 Corinthians 12

Kari Biya ipingira te Paul mel kausam

1 Nainimi patowara ko kilek mu ko nunguning mel yawara bo me aratoso. Bare ani am ngual aimi patawirik ale mel ipingira te iwita Kari Biya aga kausam se arigem mu ko balikko. 2 Ani Kris kari bo ko ikiwasam, nu yar 14 namaram mu te Kari Biya tam ilak kualala duruk wonong mu te namaram. ^{▼▼2 Cor 12:2-3 Yar 14 namaram mu te: mu A.D 44 te iwita. Ikia kari suen biya ikisan mu Paul kota numi balso. English den te mu “third heaven” aniso. Mu iwita agila: gira mu ali ko kualala taiti nuwi, se ko kowom kaora ko kualala mu worem sige baras te aniso, se mu ko kualala nunguningkiri, namotam te nama menaso, mu Kaem ko kuwim laili, borta ko balso agila.} Bare nu kumik guang ago namaram agi, dora la namaram agi, wore ani me ko ikisam, Kaem kota ko ikiso. Bare ani ikisam kari umutang 4 kuwim ningo paradise ningi baga se den kari saki balmonko me terong, se ngual ngual balmonko mena tala, mu ikiam. 5 Se ani kari umutang mu ko nup patawirikko. Bare ani agata aip me patawirikko, munan ani asokel mena mu aga wetang te beteso mu la ko balikko. 6 E ani agata aga aip patawirikko iwita ikiek, mu ani kari ngualara mu nunga iwita mena, ani mu den nunguning la balikko. Bare kariimet sang aga aip biyala patawomon bore ko, ani aimi me patawirikko. Aninga angamang kariimet den agiring te ikiman, ale mel ani beterem se aringiman, mu te la diram aga ikimonko.

7 Se ani mel yawara yawara Kari Biya aga kausam se arigem wore te aimi patawirik bore ko se, Kaem balam se Satan yaman bo, tam kore aga atumu barurumura iwita, angimik te beteram. 8 Se tom ilagala suwan ko, ani Kari Biya to sapurukko ngatangarukasam. 9 Bare nu iwita aga maonam, “Ani angamang kisisam ale ka sangorsam mu terong mam. Mu awuk, tom keta ka sokel menaso se bagasam, mu aninga asokel nika ningi ura ninguru iluso.” Nu buta aninga maonam. Buta se munan ani te asokel mena bagasam mu ko amilmil ago la balikko, mu te Kristus ko sokel agate anirukko. 10 Umutang ko, tom ani asokel mena bagasam agi, Kristus nup ko ikup duap duap gisam agi, kariimet aga bita maguwusan, den memek aga manorsan agi, bare tom mu te ani am ko amilmilasam. Mu awuk, tom ani asokel mena bagasam, tom umu te ani asokel ago bagasam. ^{▼▼2 Cor 12:10 Nasokel menaruk bare Kristus ko sokel te baganakko: 2 Cor 1:8-9; Rom 5:3-4.}

Paul Corinth Kris alo nunga ikia tawun biya moakaso

11 Ani kari ngualara iwita munakakasam. Bare mu nina nengeta ani munakirikko aga diruwuman se! E nina aninga munan ningo nuam mu ko aip patowaral mu asele munan diram! Mu awuk, ani mel yam iwita agi wore, ani nenenga “apostle bibiya” sumu nobowa ningi me ta bagasam. 12 Ani ninga ningi baga se ikup gikasam bare am sail te kilek duap duap sokel ago la bitakasam, umutang te nina am ikial ani apostle nunguning. 13 Se ani munan awuk bore Kris saki alo nunga ningi bitakasam wore ninga ningi me bitakasam e? Mena. Bare munan suwanta ani me bitakasam mu iwita: ani nengete mel me gikasam. Se ani ninga isarsam, aga memek umutang mu siwu aisalko!

14 Se aitak aking nengete namirikko ikiwasam umutang mu aninga tom ilagala suwan. Bare ani ikup me ningarik ale nengete mel me giekko. Mu awuk, ani nenenga manga melmasak sumu ko me kuesam, bare ani nenengeta ninga kuesam. Nina ikisan, kuriang alo mu nunga nunam nonet nunga bitarmonko mu me terong. Mena. Mu nunam nonet mu asele nunga kuriang nunga bitarmonko. 15 Se ani ninga nedera sangikko aga mel suen la am menawurik, ale angimik guang karogo la am amilmil ago la kuerikko. Ani biyala ninga kuerik, se mu ko koma nina ani ninguru me aga kueral e?

16 Nina ikisan, ani ikup me ningarukasam ale nenenga mel me gikasam. Bare ani kawel kari se lage sang te ninga kulurukasam ale ninga mel gikasam e? 17 Se awuk a? Ani kari nina nengete namomonko nunga awurem se namaman wore te bo ninga kulem e? Mena. 18 Ani Titus manem se nengete namaram, se nanga bo agotala manem se ilak namaram. Se Titus kawel te ninga mel sang giam i? Mena tala. Nina ikisan, ana ilagala Korang Bur suwanta te aolak iluwasan, ale nanga bagara aolak mu te munan koma suwantatala karo tusan.

19 Bare nina den imi kauman ale ana nangata nainimi te atumu saonga ko karogo kaesan iwita ikisan e? Bare mena. Ana mu Kristus ko ura kari bagasan, ale Kaem koma te den balsan. Aga singsang yawara, ana mel duap duap betesan mu nina te sokel ningarnakko la! 20 Mu awuk, ani nguangasam, ani nengete namirik se munan nina te bagaralko ani ko kuesam mu te me bagaral se ningarkik bore ko. Aking nina betela ani agarkal, bare ani kari nina arigalko kuesan mu iwita me bagirik se agarkal bore ko. Aking ani ninga ningi kilek memek iwita mu aniruk se arigek bore ko ninguru nguangasam: den tagira gurugumura, ninimi ko nengemang magara se bagara lila mena, ining singi, ninimi patowara ale kualala namara, bo buring ko den bala, nisipiling lagara, nengeta ninimi paoga kirker, 21 munan ewere ani arigek bore ko nguangasam. Ani pelerik nengete tairik se aga Kaem nenenga munan ewere ko nemekete ani dolara aisuk bore ko! Se ninga ningi kariimet ulengkala memek bitakasan, o saman katagot, nomotam nongomang barasa, kilek memek duap duap bita lagaman bare me giris palagaman mu ani nunga amononge kapuruk bore ko!